kleine Leseproben

Dr Karel un sei Guste sitzn nu vor dn Fernsehkastel. Wie ahn jeden Ohmde sahn se ahch heite wieder de Werbung mitn Obnamme un doss dr Tuht off die wart, die ahm net obnamme wulln. Joh Zackel, die kenne än ower Angscht machn in dn Fernsehkastn. Ower se entschließen sich, doch mitzumachen Statt drei Flaschen Cola nur noch äne pro Ohmde un nur noch äne Tiete Schipps statt viere. Offn Nackenfläsch mit Hollandaise, dn Fettrand und dn sießen Nohchtisch wulln se ower net verzichten. Nohch zwä Wochen guckn se sich ahn. Hot sich nischt geännert. Wosse wull vor än Bledsinn sahn in dr Werbung? Denn folling se dn Programm, wos de for Obnamm-Pilln wirbt. Ahch die frassn se zu Sump, jedn Ohmde äne Handvull. Noch wättere zwä Wochen nischt! Joh, wenn dos alles nischt hilleft, kenne mr ahch nischt dodrfier. Dos is doch nur Werbung. Nohch wättere zwei Wochen han se Gott sei Dank ihr altes Gewicht wieder. Hot lange genung gedauert un war ahch net billich. Do klingelts ahn dr Tiehr. Dr Karel sappt hin, hält mit dr linken Hand de Hus fest ahn dn Marsch gedrickt, weiler de Husntrahcher obgeklippt hot. Draußen schtieht äner mit ne Kapuze un ner Sens. “Wuhnt hier dr fette Karel?” “ Wos? Junge! Unnere Gartnhilfe sull erscht morring kumme. Wos witte den nu all hier. Un denn reckt ne Schär hin, bein Blumebeet brahchste käne Sens!”

Dr Gustl un es Lowise hahn sich in ähn Altnheim ähnquartiert, weiel se drhemm net meh su zeracht gekumme sän. Ähnes Tohks schtudiert es Guste de Zeitunk un frohcht dn Gustl: "Du Gustl, sah ämol, iche lahs hier grohde wos vun de Flitzersch. Wos sän denn dos for weche, disse Flitzersch?". Dr Gustl: "Nu ja, dos sän de junge Leit vun heite, die ziehn sich nackelt aus un denn renne die iwer dr Schtrohs, die flitzn iewer dr Schtrohs. Deswahng häßn die ahmd de Flitzersch." "Uh ja" sahts Lowise, "dos mach ich heite ohmd ahch ämol unten, wenn Ohmdbrut gitt". Es Ohmds, als alle Bewuhnersch in dn Schpäsesohl sitzn, dunnert es Lowise den ahch tohtsachlich nackelt dorrich dn gansn Sohl. An ähn vun de Tische sitzn ahch es Miening un es Lene. "Och, wos is denn dos do ahmd gewahsn, " wunnert sich es Miening. "Dos is es Lowise gewahsn" antwort es Lene, "dos hot uns woll sei neies Klähd zeing wolln." "Su?" gitt es Miening zerick, "alsu dos hätts vierhar denn adr ruhich ä bissel biehcheln kenne."

Off dr Schtrohß traffn sich dr Thedor und dr Edeward. Dr Edeward hot zwä dicke blae Ahng. „Auf Edeward, wie siehst du denn aus? Wu hoste dr denn die bähdn Veielchn obgehuhlt?“ frehcht dr Thedor denn ahch glähch. „Hähr mr bluhs auf,“ saht dr Edeward, „suwos hoste ahn End drvon, wenn de annere Leit hallefn witt. Iche schtieh neilich ahn dr Bushalteschteht un lauer aufn Bus nohch Gorschler. Vor mr schtieht ähne Frah, bei dar hot sich hinten es Klähd mitteltdrmank zwischn ihre bähdn Backn geklemmt. Un dos hah ich denn do nausgezauelt. Die dreht sich denn im deswahng, un ahnschtatt sich bei mr dodrfier ze bedankn, dunnert mr diss alte Blahstr ähne genah off mei rachtes Aach.“. „Un wu hoste das annere Fatschaach har?“ wills dr Thedor gans genah wissn. „Nuja, „mähnt dr Edeward trehch wack, „iche hah dos Klähd denn wiedr do neingeschtoppt.“.